五年啦


個人分享
Tagged With: , , , , , , , , ,

「五年」

時間真係過得好快,唔經唔覺已經同嚟個人一齊五年。真係好快!由當初一齊讀書,影婚紗相,直至結婚,到渡蜜月,再有咗郭大少,跟住出咗世一年。基本上每一年都有唔同嘅事情發生。真係好慶幸有一個人同我行咗嚟五年嘅艱苦旅程。當然有開心同唔開心,但係我仲好記得第一次認識你,我哋有幾咁合拍。好希望我哋嚟個旅程唔止係五年,而係好多好多個五年!

「紀念」

今日係同老婆拍拖五周年紀念日,而今年多咗郭大少嚟個電燈膽同我哋一齊過。上年因為佢啱啱出世,所以我哋都無乜點慶祝。今年本來諗住可以同老婆慶祝生日嘅同時,大家可以順便係蘇梅慶祝五週年記念日,但係因為要搞掂郭大少先所以好晏先至出去食嘢。雖然知道有咗小朋友之後,二人世界嘅時間會少,但係有時都希望同老婆過返啲二人世界嘅生活。

「人生」

其實自從有咗郭大少之後有好多嘢唔同咗,因為好多時我哋嘅生活同重心都傾向咗係我哋嘅愛情結晶品身上。嗌交自自然然亦都多咗,但係邊段愛情或者關係係唔會嗌交呢。其實我仍然好記得五年前嘅今日,因為我做咗一個人生入面連我自己都以為唔會做嘅決定。因為你,再次令我知道乜嘢叫做幸福。因為你,我再次知道乜嘢係愛。多謝你過去五年同我同甘共苦,希望可以好快俾到你我心目中嘅生活!我愛你,老婆!

(Visited 43 times, 1 visits today)

Also published on Medium.