真回憶


個人分享
Tagged With: , , , , , , , , ,

「旅行」

有時同老婆係度諗,我哋會唔會好自私咁帶著郭大少去旅行。因為好多時會覺得佢無啖好食,又無覺好瞓。因為老實講小朋友真係都未必記得自己去過旅行。當然我自己細個去過邊度都未必記得,好多時都係阿爸同阿媽講先至知道自己細過去過某啲地方。有時自己睇返影過嘅相先至有印象原來去過某啲地方做過某啲嘢。但係睇返啲相嘅時候真係覺得幾搞笑。

「回憶」

今次係同郭大爺嘅第二次旅行,當然你話帶著一個啱啱一歲嘅小朋友去旅行會唔會好麻煩?其實真係麻煩㗎,因為好多以前同老婆兩個人去旅行會做嘅嘢,基本上而家都無得做。但係有時睇到佢見到好多唔同嘅事物其實又真係幾開心。老實講今次旅行去蘇梅無諗過佢會咁興奮,而雖然知道佢未必記得但係嚟啲回憶會永遠係我哋心中。希望佢睇番自己細個嘅時候都會覺得開心啦!

「值得」

當然好多時我都盡量希望同郭大少影多啲相,因為每一次嘅旅行都係一啲好寶貴嘅回憶,但係要帶佢出街兼且要帶部相機影相真係有點兒難度。有時因為要照顧佢真係連影相嘅時間都無。而每當佢好開心咁見到一啲新嘅事物,其實有時辛苦啲都覺得值得。今次去蘇梅感覺佢又同上次去沖繩唔一樣,自己開間酒店房四圍爬,見到個泳池真係想衝落去,雖然未識得行但係好興奮要我哋扶著佢四圍走。嚟啲回憶真係有錢都買唔返!


Also published on Medium.

Comments are closed.

 
  • 暖化中全球暖化問係越嚟越嚴重,好多時睇新聞都會用百年一遇嚟形容不同嘅極端天氣。好多人都會覺得全球暖化關自己咩嘢事,甚至乎覺得唔會影響到自己。所以無人會理會我哋生活緊嘅地球其實已經病入膏肓。仲以為有生之年唔會有問題?咁就大錯特錯!如果北極圈嘅氣溫可以達到三十度,咁你諗下啲冰會去晒邊?除咗水位上升之外,海水嘅鹽份降低,導致極端天氣越嚟越頻繁! Also published on Medium. Click to share on Facebook [...]
  • 盧凱彤其實睇到新聞嘅時候真係好呀愕然,起初以為自己睇錯,但係當不同嘅媒體都開始報導嘅時候就知道佢真係離開咗。盧凱彤係一個我好欣賞嘅音樂人,好多時睇演唱會都會睇下係唔係佢彈結他。或者大家對佢嘅了解唔深,甚至乎佢唱過啲乜嘢歌或者患有燥鬱症都唔知。有時看似一切都正常,但係有時正常就正正係唔正常。你辛苦了!雖然係一個好難接受嘅事實,但係相信大家都會尊重你嘅決定同永遠記得你! Also published on Medium. Click to share on Facebook [...]
  • 三歲了眨下眼郭大少就已經三歲了,當然今日要同佢慶祝啦。一起身同佢去上音樂堂,之後就去咗啟德嘅一間親子餐廳玩,然後再飛入去迪士尼睇巡遊同玩咗陣,因為夜晚同屋企人食飯慶祝。依家啲小朋友真係幸福,不過都係希望佢有一個開心嘅生日啫!見到佢健健康康咁成長,每日燦爛嘅笑容,其實就已經好足夠。不過時間真係過得太快,由一個嬰兒搖身一變,變成一個小朋友! Also published on Medium. Click to share on Facebook [...]
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。 Also published on Medium. Click to share on Facebook [...]