談奧運


個人分享
Tagged With: , , , , , , , , ,

「奧運」

你一生人有幾多次會係舉辦奧運嘅國家居住?我慶幸暫時遇過兩次,一次係二千年嘅澳洲悉尼,而第二次係二零零八年嘅中國北京。不過唔知點解每次都無入場睇,希望有生之年可以有機會同老婆去睇現場嘅開幕禮。不過依家嘅開幕禮真係好似一個國家展示實力嘅舞台,而好多國家都希望透過舉辦奧運會而帶動到經濟,因為每當嗰個城市會舉辦奧運就必定會大興土木。

「巴西」

好多人都會覺得今次嘅巴西里約熱內盧嘅奧運會搞到一鑊泡,雖然真係有好多甩甩漏漏,但係個開幕儀式真係唔錯。而當然今年同以往一樣,好多焦點都放喺中國運動員身上,只不過開始咗幾日,中國隊好似出師不利,好多面金牌都錯失咗。不過最蝦碌嘅係竟然連中國嘅國旗都印錯咗,而最大嘅問題係啲國旗由中國廠商製造,所以搞到鬧又唔係,唔鬧又唔係。

「香港」

其實如果以香港依家投放係培訓運動員嘅資源嚟講,香港其實已經好叻。首先都唔好講攞唔攞到獎牌,因為可以參加奧運嘅運動員真係好唔容易。今次香港總共有三十七名運動員參加九項嘅比賽,而當然大家都會關注游水,單車同桌球嘅賽事。其實運動員嘅生涯係好短,而且香港係一個做一個運動員真係好難,所以大家應該多啲支持香港嘅選手!


Also published on Medium.