科技界

「選民」

首先想講講,無啦啦點解科技界會多咗咁多選民?選民登記冊嘅數據顯示,今年嘅選民人數,較二零一五年大幅度上升超過六千名選民。升幅多達一倍,而新增的選民大部份都係個人票嘅選民!老實講我唔知有幾多人會無啦啦走去入所謂嘅協會,之後仲走去登記做功能組別嘅選民。真係有咁多人關心資訊科技界?當然我身邊有好多熱衷嘅人士,但係又有無咁多我真係唔覺!

「奇怪」

首先講明唔係話撐邊個科技界功能組別嘅候選人,但係無啦啦收到一個從來唔識嘅候選人寄嚟嘅電郵,老實講我真係唔知你係乜水!從來都唔知佢為科技界做錯啲乜,亦都唔知佢為香港做咗啲乜,但係一去谷歌搵搵佢就勁多負面新聞。老實講如果真係有心為香港,為業界,唔駛就嚟選嘅時候先至出嚟,重點係好多人都唔知你乜頭乜路,唔好意思算我唔夠交遊廣闊。

「垃圾」

講到尾,無啦啦跳個唔知乜頭乜路嘅人出嚟,當然如果你唔寄電郵俾我,我係唔會知你乜水。其實真係憑乜嘢覺得自己可以幫到業界?我亦都唔知佢要重啟啲乜?真係唔好意思,我真係唔知你係邊個,就算好多人話你好紅都好,我作為其中一位選民,我真係唔認識你。況且睇完你個背景之後,我其實已經對你無乜好感,所以你以後嘅郵件將會變成垃圾郵件處理!


Also published on Medium.

Comments are closed.