大公司

「遊戲」

以前係大公司做嘢其實都算好彩,因為大部份嘅上司都唔錯。只不過大公司真係好多流程,所以當你越做得高級,你就越知道個遊戲規則,你就知道點樣可以處理得更快。有時你亦都會好奇點解有啲人可以升職升得咁快,當然唔係個個都係靠自己嘅能力,但係嗰啲人真係好易俾人放逐。所以千祈唔好走精面,如果你個靠山失勢嘅時候,分分鐘連你都唔會有好日子過。

「模式」

好多人都問我係大公司做嘢點解會頂得順,老實講我其實最討厭公司政治同繁複瑣碎嘅流程。好多嘢都係講程序,所以有時做嘢會綁手綁腳。只不過如果你懂得每間公司嘅營運模式,其實好多嘢都可以避免。有時係大公司做任何嘢都要鍥而不捨,一次唔得就兩次,兩次唔得就三次,唔好咁易放棄。同時所有嘢都要白紙黑字,只要做好自己唔好俾人挑剔到,基本上都唔會死!

「管理」

我經常同啲後生講,係大公司係要學佢哋嘅管理而唔係為錢,因為規模夠大,可以接觸到唔同地方嘅人。透過同其他國家嘅同事合作,其實可以擴闊視野。當然如果有機會去其他地方公幹,當然要把握機會去睇多啲。只不過當你變成空中飛人嘅時候,你就唔想再飛了。而我最大嘅得著就係管理一個跨國嘅團隊,因為真係大公司先至可以學到嘅經驗。所以做大公司係有得亦有失!


Also published on Medium.