靠衣裝


個人分享
Tagged With: , , , , , , , , ,

「社會」

前幾日係社交媒體見到一個實驗,佢哋搵咗一個六歲嘅小朋友,首先安排佢著得比較靚,然之後安排佢企喺條街度。過咗一陣好多人都會走埋去問佢嘢同關心佢。不過之後個小朋友就變身成街童咁,然後再一次安排佢企喺條街度,但係今次嘅結果就好唔同。今次完全無人理會佢,甚至乎避開佢。而其實全世界都係咁,好多人都會靠外表,靠衣著去判斷一個人!

「衣裝」

人靠衣裝,其實相信好多人都會聽過。當然大家都會話,唔同場合要着合適嘅衫,如果唔係就會顯得唔尊重。雖然某程度上我會認同,但係如果一個人要靠衣著先至得到某些人嘅肯定,對唔住,嚟點我就好唔認同。如果只係睇表面,老實講真係好難知道你係條龍定係條蟲。有啲人真係唔會炫耀自己嘅能力同財富,所以單單憑衣著去量度一個人其實真係好膚淺。

「外表」

老實講好多人真係身光頸靚,周身名牌,但係有可能佢哋真係充大頭鬼。反而有啲著住啲又殘又舊嘅衫,分分鐘佢哋禾稈冚珍珠你都唔知。所以有時做人真係唔好咁膚淺淨係單靠睇外表而去判斷人個人嘅能力。我其實都會遇到咁嘅問題,不過當大家認識咗我之後又或者當我做過嘢之後就會知道其實係兩個人。所以除咗某啲場合我會着西裝打呔之外,其實我大部份嘅時間都係恤衫,牛仔褲同波鞋。


Also published on Medium.