講原則

「原則」

每個人都應該有自己嘅一套原則同一條底線。而做生意都係一樣,如果唔係其實真係冇乜意思。香港嘅社會就係咁,以為比少少錢就可以用人用到盡!有時仲聲大大講,而家俾生意你都唔做!對唔住,我唔係扮清高,只不過係我有我嘅原則,唔係因為錢多與少嘅問題,而係態度嘅問題。我唔怕你貨比三家,因為真係真金不怕紅爐火!

「理念」

首先我創業係為咗一個理念而去做,而唔係你話有錢俾我賺就得。當然我唔係大把生意唔憂做,亦都唔係唔志在嗰幾萬蚊嘅生意。只不過如果大家嘅理念唔係一致嘅話,其實真係好難合作,而且格硬做都唔會做到好嘅成績。純粹搵我係幫你交功課,做一啲毫無意義嘅報告同數據分析,其實真係唔好搵我,因為真係浪費我同我啲員工嘅時間同心機!

「重申」

我再次強調我公司係做諮詢同顧問嘅工作!唔知係唔係香港啲人永遠淨係覺得嚟個世界只有廣告或者市場推廣嘅公司,因為佢哋真係唔識分!與此同時我做人做事都係一樣,如果你搵我間公司做嘢,唔該首先要尊重下人。就算收你錢都係咁話,因為唔係比咗錢就大晒!當然如果我哋服務唔達標,我會幫你做到滿意為止,事關名譽攸關,我唔會攞自己嘅品牌較飛!

(Visited 34 times, 1 visits today)