被失蹤

「真相」

經過咗咁多個月,終於有人夠膽出嚟講返個真相出嚟!重點係我哋係一個言論自由嘅城市,竟然連講返個真相出嚟都要思前想後,擔驚受怕。咁香港真係一個自由嘅社會嗎?口口聲聲話一國兩制,嚴正遵守基本法,高度自治,等等嘅漂亮說話,其實到最後所謂嘅五十年不變就因為今次嘅失蹤事件不攻而破。而今次嘅事件再一次嚴重打擊香港人對中國政府嘅信任!

「問題」

今次銅鑼灣書店嘅事件正正反映咗香港依家嘅問題所在,好多嘢都已經完全顛倒晒是非黑白。仍然有人繼續掩住良心做人,擘大眼講大話。講到尾大家都係香港人,就算唔係林榮基出嚟講個真相俾廣大市民知,老實講唔通真係相信佢哋失蹤係自願咩。好相信嚟啲咁嘅事件只會陸續有嚟,就正如林榮基講,今次嘅事件唔單止係佢個人嘅問題,而係全香港人嘅問題!

「信心」

雖然香港人係法律上係中國公民,但係乜嘢叫做一國兩制?如果係香港做任何嘢,講任何嘢都無自由嘅話,乜嘢係一國兩制?老實講就算依家政府話會跟進同交代今次事件,你會信咩?今次嘅事件其實唔需要太多嘅爭議,誰是誰非其實明眼人一定睇得出,事關真係太多疑點同問題都無辦法講得通!無論林榮基又好李波又好,就算各執一詞都好,呢件事已經令好多香港人完全失去信心!


Also published on Medium.