識放手

「時間」

其實一個人一日只係得二十四小時,而當中應該有六至八個小時係用嚟休息,三至四個鐘頭食飯,所以基本上用嚟做嘢嘅實質其實得十二個小時。與此同時當你真係由二十歲做到五十五歲,其實講真你得三十五年嘅時間工作。而工作係永遠唔會做完,因為日日新鮮,邊樹真係做得完㗎!當然好多人會話你做嘢效率低,但係就算效率有幾高,聽日咪又有新嘅嘢做!

「對話」

仲記得以前有個老闆同我講,一個人只係得一個腦袋同一對手,你認為你可以做到幾多嘢?當時我唔知可以俾啲乜嘢反應佢,因為真係唔知點答佢!然後佢繼續講,每個人嘅能力有限,無可能一個人可以做晒所有嘢,因此要學識放手。相信好多人聽完會諗如果我將所有嘢放手咁我嘅價值係啲乜!跟住老闆就話,當你學識放手嘅時候,你先至會獲得更多!

「放手」

以上嘅對話係我啱啱初出茅廬,管理團隊嘅時候同老闆嘅一番對話。到咗今日我仲記得要學識放手!雖然要放手俾團隊做唔係問題,但係好多時你會覺得好浪費時間,因為做完都未必達到你嘅要求。但係如果將所有嘢攬晒上身,其實不單止團隊唔會成長,最重要嘅係你會俾更多嘅工作纏身而無辦法做好你該做嘅事情!到頭來得不償失,所以老闆經常提我,要放手,如果唔係你就會原地踏步!

(Visited 39 times, 1 visits today)