親子遊

「旅行」

今次同郭大少去沖繩,佢真係算幾叻仔!一上飛機佢就當咗架飛機係遊樂場,非常興奮!之後一如以往,周圍係度撩人玩。到咗酒店之後佢仲興奮,係度周圍爬。到咗夜晚我哋去食飯,基本上佢都要瞓覺,所以要全程抱著食飯。但係最起碼同佢去睇咗動物,去咗水族館,落咗兩次水,去睇我哋吹玻璃。當然最重要嘅就係買佢啲日常用品!

「親子」

終於同郭大少去完五日四夜嘅沖繩嘅親子遊!今次係第一次我決定出發前唔帶部電腦去旅行,最多都係帶咗部平板電腦寫文。因為去五日落足五日雨同湊住郭大少,所以無乜用相機影相。而且好多時都要揸車,所以基本上連上網嘅時間都無。今次沖繩之旅真係可以近乎完全將所有時間俾晒屋企,真係唔知幾耐無試過近乎零網絡嘅日子!

「感想」

郭大少只係得嗰十個月人仔,要佢上車落車,舟車勞頓,其實有時都覺得佢辛苦。不過至少係自駕遊,所以佢至少可以係車入面瞓覺。而今次最明顯嘅係佢驚一啲大過佢嘅動物,去到海邊會怕啲海浪,見到啲魚係個水族館入面游嚟游去好興奮。另外佢出街真係好黐我,因為係屋企,佢要媽咪多過要我。只係佢有時唔肯食嘢真係有啲頭痕。希望快啲可以再同佢去旅行啦!


Also published on Medium.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

 
  • 暖化中全球暖化問係越嚟越嚴重,好多時睇新聞都會用百年一遇嚟形容不同嘅極端天氣。好多人都會覺得全球暖化關自己咩嘢事,甚至乎覺得唔會影響到自己。所以無人會理會我哋生活緊嘅地球其實已經病入膏肓。仲以為有生之年唔會有問題?咁就大錯特錯!如果北極圈嘅氣溫可以達到三十度,咁你諗下啲冰會去晒邊?除咗水位上升之外,海水嘅鹽份降低,導致極端天氣越嚟越頻繁! Also published on Medium. Click to share on Facebook [...]
  • 盧凱彤其實睇到新聞嘅時候真係好呀愕然,起初以為自己睇錯,但係當不同嘅媒體都開始報導嘅時候就知道佢真係離開咗。盧凱彤係一個我好欣賞嘅音樂人,好多時睇演唱會都會睇下係唔係佢彈結他。或者大家對佢嘅了解唔深,甚至乎佢唱過啲乜嘢歌或者患有燥鬱症都唔知。有時看似一切都正常,但係有時正常就正正係唔正常。你辛苦了!雖然係一個好難接受嘅事實,但係相信大家都會尊重你嘅決定同永遠記得你! Also published on Medium. Click to share on Facebook [...]
  • 三歲了眨下眼郭大少就已經三歲了,當然今日要同佢慶祝啦。一起身同佢去上音樂堂,之後就去咗啟德嘅一間親子餐廳玩,然後再飛入去迪士尼睇巡遊同玩咗陣,因為夜晚同屋企人食飯慶祝。依家啲小朋友真係幸福,不過都係希望佢有一個開心嘅生日啫!見到佢健健康康咁成長,每日燦爛嘅笑容,其實就已經好足夠。不過時間真係過得太快,由一個嬰兒搖身一變,變成一個小朋友! Also published on Medium. Click to share on Facebook [...]
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。 Also published on Medium. Click to share on Facebook [...]