停一停

「無奈」

有時真係好無奈!無奈嘅係樣樣嘢都同自己背道而行!雖然知道人生係如此,但係嚟一刻真係好想停一停,靜一靜,諗一諗!等自己有啲喘息同歇息嘅空間,諗下其實依家做緊嘅嘢係啱定錯,之後嘅路應該係點樣行,下半世係應該邊樣過。近排身邊發生咗太多嘢,其實真係無乜時間去消化,去處理。只係硬着頭皮頂硬上!

「壓逼」

近排可以自己靜靜哋諗嘢嘅時間越嚟越少,有時真係想放縱下,乜嘢都唔好理,離開香港嚟個地方,自己好好調整吓!不過當然現實係無可能啦!其實有時做人做事都應該停一停,向後退一步,等自己有啲空間去望清楚前面條路應該點樣行。有時跟車太貼真係好容易出事!不過開始發現係香港有時比較艱難,唔知係唔係同個社會有關,總係有種壓逼感!

「犧牲」

係創業路上經常到要停一停,有時死衝爛衝其實係無用。真係要睇清睇楚,而好多時當你有一大堆嘅事情要解決嘅時候,其實好容易就會迷失方向。當然打工仔亦都需要,因為好多時當你同間公司賣命嘅時候,有可能你亦都放棄緊某啲嘢,而家庭係其中之一。有時係唔係為咗高少少嘅人工,高少少嘅職銜就要放棄人應該有嘅生活。人生到底係為啲乜,大家應該停一停,諗一諗!因為你只活一次!

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.