木人巷

「銅人」

每當講到木人巷,當然就唔少得少林寺十八銅人!要身懷絕技當然要努力練功,就正如人生一樣,要擁有十八般武藝就一定要捱過木人巷!好多嘢真係唔好咁短視,以為今日賺多個一千幾百就俾人成功。當大家開始投入社會工作嘅時候,慢慢就會發現其實係唔同嘅工作,唔同嘅崗位,只係為你嘅下一步作準備。經得起考驗先至會成功!

「籌謀」

每一年呢個時候,好多人都為咗佢哋嘅將來而去籌謀,無論係揀科入大學或者啱啱畢業準備投身社會,對於好多人年輕人嚟講係一大難題。其實每個人都有自己嘅長處同短處,而無論係乜嘢年代都好,只要肯捱其實無乜嘢無可能!所有嘢都係要由低做起,無可能一步登天。有時真係唔好急功近利,正所謂物極必反!

「社會」

而家嘅社會係講求執行力,所以淨係讀死書係無用,最緊要係要識得變通,因為而家嘅社會真係變得好快,如果只係一成不變其實好快就會被淘汰。人生基本上就係一條木人巷,每日都會有唔同嘅嘢等住你。所以無論你選擇入邊行,甚至之後轉行,到最後都係好睇你自己嘅選擇行邊條路。無人可以話比你聽點樣行,但係你唔試過又點知呢?


Also published on Medium.