放長假

「打工」

作為一個打工仔,當然好多時候都會諗幾時有假放。而每當放假就離唔開玩盡,食盡,瞓盡,如果唔係點對得住自己。而每年都會留意下一年點樣請假先至有著數,要攞盡佢唔好蝕俾公司嘛!係唔係?所以打工仔真係計到盡,但係放完長假期之後,其實好多時係假期積積埋埋嘅工作未有係要自己返嚟處理返!真係有事搵自己嚟搞,就算俾你放更多假到無用啦!

「父母」

有乜嘢工作係一年三百六十五日都無得放假?未就係阿爸同阿媽囉!以前放假就會諗去邊度旅行,去邊度休息下,但係當有咗小朋友之後,其實放假分分鐘仲辛苦過返工。放假就當然希望盡量陪多啲自己嘅小朋友,因為平時返工早出晚歸,所以大部份嘅家長都會選擇將自己嘅假期奉獻俾佢哋。所有嘅節目都係以小朋友為中心。假期從此再不一樣!

「創業」

好多人以為創業就可以鍾意幾時放假就幾時放假,老實講放假對於創業者嚟講有時唔放好過放。好多時其實真係會完全唔記得幾時係公眾假期,人哋唔講真係唔知,因為放假真係唔係咁重要,事關放假都要做嘢,唔同打工。所以對於創業嘅人嚟講,唔係話佢哋唔放假,只係大家放假嘅時候佢哋大部份嘅時間都會係繼續做嘢。到真係完成工作先至會放鬆一下!


Also published on Medium.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.