九個月


個人分享
Tagged With: , , , , , , , , ,

「回顧」

話咁快又一個月,又係時候寫下郭大少今個月嘅趣事。佢終於識得向前爬仲要越嚟越叻,而家直頭識得翻過啲障礙物去佢自己想去嘅地方,看羊羊嘅階段終於來臨!屋企大部份嘅嘢基本上都係為郭大少而設,因為防止佢跌落床所以加咗個床欄,又怕佢爬出地板所以又加咗個圍欄。不過唔知係唔係出牙嘅關係所以前嗰排唔係點食嘢,所以繼續瘦瘦豬!

「趣事」

今個月最搞笑嘅就當然係佢識得開始呷醋,老婆只係同大哥玩下佢竟然大聲嗌媽咪係佢嘅,我去同其他小朋友玩又會急急腳咁爬過嚟搵我要我抱。當然心入面我哋兩個都好開心啦!原來咁細個已經識得呷醋。不過今個月真係痴身咗,真係名符其實嘅樹熊。有時老婆話我哋係唔係幫佢改錯名,應該叫佢樹熊先真。我哋見佢喺屋企爬得幾叻,所以帶咗佢去玩爬行比賽,志在參與!

「食嘢」

講到郭大少最鐘意食嘅嘢就莫過於香蕉,佢真係可以一個人食晒成隻蕉。除咗個樣成日俾人話似馬騮仔之外,其實佢連食嘢都好鬼似!之前老婆試過比啲胚芽米佢食,但係反應一般。之後我試過俾啲白飯佢食,竟然好鍾意。前幾日趁我哋煲咗啲白粥,所以俾佢試一試,點知又肯食喎!真係一天都光晒,我以為自己個仔變咗做西人,唔食飯添。而家應該可以整多啲嘢比佢食啦!

(Visited 42 times, 1 visits today)

Also published on Medium.