又爆芒


個人分享
Tagged With: , , , , , , , , ,

「爆芒」

我相信好多人都會試過跌爆電話個芒。所以我通常一出部新機第一時間就走去買個手機殼同嗰芒貼,因為每次整花咗部機都會好心痛。依家啲保護貼越嚟越勁,出到強化玻璃再唔係以前咁得一塊膠咁兒戲。不過係唔係有塊保護貼,有個機殼就代表唔會爆芒?事實係一樣會花,一樣會爆。只不過比起完全無嘅好囉!但係爆芒真係肉都赤埋!

「灰爆」

我用電話用咗咁耐真係好少試過跌爆芒!近排真係唔知啲發生咗啲乜嘢事,接二連三咁跌爛電話。今年啲電子產品真係唔係透過鍾意我!首先年頭一部個屏幕無啦啦死咗,搞到連電話都聽唔到。之後同郭大少去慶祝生日,落車嘅時候部平板電腦跌咗落地,成個芒爆咗。上年先至換咗部手提電腦個屏幕,點知唔知幾時比我撞爆咗得返八成。今日係屋企竟然都可以又跌爆咗另一部電話個芒!真係灰到爆!

「點算」

有時爆咗個芒都唔知整唔整好,攞去原廠整就一定貴到嘔,但係去電話鋪搵人整有時又唔放心。如果拎去賣又唔見一千幾百,所以真係好難搞。我真係未試過每個月都跌爛啲嘢,今年真係破晒紀錄。最慘嘅係要用嚟搵食,手機爆咗都係其次,但係電腦爆咗真係好大鑊,乜嘢都做唔到。雖然係有背份係服務器到,但係都煩啦無啦啦唔見錢!今年睇嚟都係破財嘅一年!


Also published on Medium.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.