大細超


個人分享
Tagged With: , , , , , , , , ,

「入學」

老實講香港依家嘅教育真係去到一個無可挽救嘅地步。小朋友要入學首先就連佢出世嘅月份都有關係!講真一個得一兩歲大嘅小朋友可以面試面啲乜?阿爸同阿媽做乜嘢又同你收唔收個學生有關?不如啲學校要家長提供入息證明同信貸記錄好唔好?真係超級離譜!辦教育竟然辦到淨係挑選佢哋認為有能力嘅小朋友,咁仲係一視同仁?況且得個一兩歲人仔可以話俾你聽幾多嘢?

「月份」

到咗今時今日我其實都唔係好明白啲學校嘅收生標準,乜嘢叫做「大B」,乜嘢叫做「細B」。點解大啲就會有機會入啲所謂嘅名校?當然大啲嘅小朋友識嘅嘢係比較多啲,但係就係因為咁佢哋比較有優勢,而好多學校選擇取錄大個啲嘅小朋友。講真咁同歧視有乜分別?我係唔係可以去平機會去舉報所有嚟啲咁嘅學校呢!唔通生小朋友都要擇日咩,呢啲嘢無得擇㗎囉!好唔好?

「歧視」

咁嘅教育制度真係連幾時有生小朋友都要計算在內。遲下我諗香港無人會生「細B」因為要入好嘅學校真係要個小朋友出世係啲好嘅月份。過多十幾二十年香港真係有機會再無某啲月份嘅小朋友出世。其實真係唔輪到佢哋揀,咁嘅制度公平咩?呢個係乜嘢世界,就連幾時出世都主宰佢哋讀書同教育嘅命運。真係人都癲!我真係覺得好有歧視嘅成份囉!


Also published on Medium.