懶人包

「廣告」

今時今日嘅廣告真係五花八門,真係唔似得以前咁得傳統媒體咁簡單。曾幾何時我都係以創作總監嘅目標出發,所以第一份工係做廣告設計,當然現實就係依家嘅工作同創意完全無關。廣告界其實同其它行業一樣都有一套自己嘅運作模式同術語,所以有好多嘢真係要係嗰行先至會識。依家嘅廣告好唔好做?見人見智啦!因為真係越嚟越複雜!

「路迪」

雖然我每次都會用前輩嚟個稱呼去介紹路迪,但係佢每次都會好謙卑咁講佢唔係,而事實上係唔同嘅行業佢都係一位前輩,真係周身刀張張利。相信如果你已經係廣告界工作或者你想入廣告界嘅話,其實真係無可能唔識路迪。自從之前佢出完《社交影響力》大賣之後,今年又有另一巨作《廣告懶人包》!而今次仲要由「白卷出版社」出版同搵咗「徐緣」及「畢明」寫序,所以點可以錯過呢?真係要快啲去入手!

「入手」

今日啱啱入手咗路迪嘅《廣告懶人包》,雖然寫嚟篇文嘅時候只係睇咗第一章,但係已經好有共鳴。其實所謂嘅懶人包,我覺得無論你係唔係廣告界嘅人都好,我都覺得你應該買本嚟睇下。除咗增廣見聞之外,至少以後唔學雞同鴨講,甚至乎唔好比人搵笨!其實路迪兩本書都用好多例子,所以其實都好容易睇得明,而且手法比較輕鬆同貼地。見到多咗人寫書,搞到我都想寫返本,《分析懶人包》!哈哈!

(Visited 106 times, 1 visits today)

Also published on Medium.