賺到盡


個人分享
Tagged With: , , , , , , , , ,

「領展」

話說啱啱年頭先至由港島東搬咗去青衣,咁啱遇著長發街市因為領展將營運外判咗俾建華而擺市。當然擺市期間有好多事情發生咗,包括無啦啦唔知係邊樹走一班人出嚟賣嘢,而我亦唔知點解真係會有人幫襯嗰班人!與此同時,建制派又好鬼厚面皮咁走出嚟話抗議,唔通佢哋思覺失調?直至早幾日建華發出最後通牒要啲商戶九月底離開!

「長發」

今次長發街市嘅事件可以話係啲無良奸商趕盡殺絕,雖然唔係第一次,而好多人仲懵盛盛,相信仲會陸續有嚟,睇吓下次又唔知輪到邊個街市。老實講啲商戶都係小本經營,而且可多都係老街坊,有啲真係靠一間舖仔嚟維持屋企嘅生計。表面上就話係提升環境質素,其實羊毛出自羊身上,佢哋加租變相所有嘢都要加價。最終咪又係我哋啲香港市民受害。

「街市」

如果你問我長發街市真係一個乜嘢都可以買到嘅地方。雖然一開始唔係太熟,但係去得多知道啲鋪頭係邊,買嘢就快咗好多,唔使四圍搵。如果佢哋要所有商戶遷出,到時我真係唔知去邊樹買餸。老實講好多係超級市場搵唔到嘅嘢你一定會係嚟啲街坊街市搵到,而且真係比較平。要將平民街市搞到好似超級市場,整啲乜乜新科技,其實真係有必要咩?講到尾,唔該「還我街市」!