落手做

「創業」

雖然話已經創業接近六年,基本上差唔多係我出嚟做嘢咁耐第二長嘅工作。我個人最大嘅問題係唔可以讀書,一見到啲書其實好多時睇唔夠十頁就已經會好眼訓。當然除咗一啲我好有興趣嘅就會睇哂。所以我好多時都係邊做邊學,唔得就試到得。因為咁嘅原因,我落手做嘅嘢係學得快過睇書。始終覺得實戰比起理論更加緊要,因為要實踐理論就要落手做。講咁多仲乜?做啦!

「落手」

我其實一直深信好多嘢要親力親為,落手做先至會了解根本問題嘅所在。當然好多人會覺得創業做老闆可以自在啲,其實之前我都有講過其實創業同做打雜係無分別。點解要落手做嘅原因係就算公司真係得返你一個人,你都可以獨力承擔,繼續運行。當然咁嘅狀況唔係唔會發生,所以有時真係唔落手做過真係唔知乜嘢回事。如果樣樣嘢都要靠人,一個唔該飛起你,到時喊都無謂。

「問題」

落手做其實仲有一個好處就係你會大約知道問題所在,甚至乎問題嘅根本原因。而且當你理解運作層面嘅問題嘅時候,你亦都清楚員工所面對嘅問題。不過要跟得上每日嘅營運真係有啲困難,尤其係當你有好多客戶嘅時候,真係無可能可以兼顧太多事項。依家真係有啲人都癲,好多嘢雖然係親力親為,但係亦因為咁分身不暇。所以就算幾想落手都好,其實真係對自己同公司都唔係好健康!

(Visited 113 times, 1 visits today)