試映會

「十年」

之前我同老婆講我好想去睇「十年」,原因係睇完宣傳片之後已經好有共鳴!當五個唔同嘅導演用五種不同嘅手法再係二十分鐘嘅時間表達佢哋嘅睇法,講真難度非常之大。慶幸嘅係有一位朋友盡心盡力咁舉辦咗一場戶外試映會!點解要係戶外睇「十年」?因為十年係可以見光!十年後香港會變成點?只要堅持香港有希望!而我亦打破一貫嘅文章格式去記錄低我嘅感想!

「浮瓜」

好多時候我哋都會將問題陰謀論化,但係點解會有咁嘅問題?原因係出自信任嘅問題!如果人民係相信當權者嘅話,會有咁多問題咩?其實政治黑暗唔係十年後先至有,其實我係雨傘期間已經親身經歷無數次。故意嘅挑釁行為,黑白合作,製造混亂,一次又一次咁係我嘅鏡頭下記錄得一清二楚。十年後先至發生?其實已經發生咗。以為你做到嘢就會無事?其實佢哋到最後都係一隻棋!

「冬蟬」

相信好多人都未必睇得明個故事,而我嘅感受同導演想表達嘅亦有所不同。我個人認為社會不斷向前,要保存嘅嘢實在太多。不論係我哋嘅文化,歷史,甚至乎價值,都慢慢不自覺地被蠶食。唯一可以做嘅就係將每樣嘢都保存落嚟,希望有日可以重見天日,得到承傳!而相信我哋亦都要反思十年後,我哋嘅下一代仲可以承傳我哋香港人嚟個身份嗎?我哋會慢慢失去自己嘅身份嗎?

「方言」

之前好多問題都係環繞語言嚟個話題,例如廢除廣東話,小學生要學簡體字等等。其實每個地方都有自己嘅方言,而普通話本身亦都係一種方言。從前外國嘅唐人街係講廣東話,但係點解依家好多時要講普通話?如果無咗廣東話嘅香港仲係香港嗎?不過可悲嘅地方係,如果連我哋都唔捍衛自己嘅方言,到最後竟然係自己土生土長嘅地方被歧視,被排斥,就連同下一代溝通都係問題嘅時候,你會點?

「自焚者」

社會嘅深層次矛盾係點樣形成?以和平非暴力嘅抗爭係唔係無用?當然有人話如果得嘅話就唔洗用暴力啦!其實依家個社會本身已經係處於自焚嘅狀態。到最後邊個想見到嚟個場面?答案好明顯!而到咗嗰一刻我哋香港人其實全部都會變成輸家。其實係雨傘嘅時候我亦都遇到一啲老人家講同我講戲入面嘅一番說話,就係分享佢哋經歷過歷史,勉勵我哋繼續堅持同爭取,唔好再次讓歷史發生係我哋嚟一代!

「香港蛋」

呢個故事係最能令我反思嘅一個故事,因為認真牽涉到我哋下一代嘅教育問題。一個洗腦式嘅教學依家係香港已經係一個好大嘅問題,好多現今嘅學生其實係無獨立思考嘅能力,因為佢哋只係接收指令去完成任務,就正如戲入面嘅小朋友一樣。見到「本地」兩個字就係違規,但係「本地」亦都指「香港」,呢個正正就係按本子辦事嘅問題。而當我哋想改變下一代嘅時候,佢哋往往變成社會嘅禍心。苦了我哋嘅下一代!

「總結」

其實每一個故事背後都有好多唔同嘅信息,雖然我無逐一去探討,但係呢個亦正正係「十年」最吸引嘅地方。佢帶出嘅訊息令我哋去反思,不論你係邊個年代,相信感受到有所唔同。我認真建議所有香港人都應該去睇「十年」,無論你有無政治背景或者預設嘅立場,只要你仲當香港係我哋嘅「家」,你就應該去睇!

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

 
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。 Click to share on Facebook (Opens in new window)Click [...]
  • 放閃日其實放閃係一個網絡嘅用語,主要係用嚟形容啲人係網上面炫耀自己。當中用得最多嘅係情侶之間互相公開自己嘅幸福同快樂,尤其係一啲單身人士搵到伴侶之後不斷發放相片炫耀自己嘅幸福。好多人會用閃光彈嚟形容,而回覆嘅通常係帶上黑超嘅表情符號,因為閃光彈好刺眼,所以要帶返副黑超擋一下啲耀眼嘅光芒!所以每逢情人節好多人都會通過唔同嘅渠道放閃! Click to share on Facebook (Opens in new window)Click [...]
  • 數據先好多公司都會有唔同嘅數據,但係到最後仍然解答唔到一啲商業上嘅問題。原因其實唔係出於數據,而係無人去設計點樣收集數據。就算有數據都唔知啲數係啲乜嘢情況下收集返嚟。最終導致啲數據無法解釋日常業務嘅問題!可多公司都低估咗收集同分析數據所需要嘅人力以及資源,通常都係到咗分析嗰一刻先至發現問題。所以點樣收集數據係緊要過點樣分析數據! Click to share on Facebook (Opens in new window)Click [...]
  • 被截停當然警察如果遇到或者發現可疑嘅車輛係有權利去截停佢,但係只不過如果因為要截停可疑嘅車輛所導致嘅傷亡係唔係有必要呢?其實係好幾年前香港警察曾經截停路面嘅私家車做路障,希望截停可疑車輛而導致安份守己嘅市民有性命財產嘅損失。而近日亦有類似「人肉路障」嘅事件發生,今次就導致兩死五人受傷。老實講點解要市民用自己嘅性命同財產去幫你截停可疑車輛先? Click to share on Facebook (Opens in new window)Click [...]