瀡滑梯


個人分享
Tagged With: , , , , , , , , ,

「以前」

諗返起以前細個嘅日子,好多時候都會喺屋企樓下嘅公園玩,唔似得依家啲小朋友日日拎住部手提電話或者平板電腦係度睇卡通片,打機。就算係屋企大部份時間都係玩玩具,或者搵嘢自娛。其實以前屋企樓下真係好多嘢玩,通常都有好多小朋友係平台花園踢波,跳繩,打羽毛球,乒乓波,踩單車。當然唔少得嘅就係 鞦韆同滑梯。我相信大部份嘅八十後嘅朋友一定有相同嘅童年。

「公園」

今日趁天氣好就同郭大少去海濱公園,而經過嘅時候見到入面有滑梯。當然而家嘅滑梯同以前我哋細個玩嘅好唔同,因為無咁高而地下再唔係石屎地。我跟住當然同老婆講不如同郭大少去瀡下滑梯,相信好多人細過嘅時候都會同老竇一齊瀡滑梯。第一次帶郭大少瀡滑梯佢都好淡定仲好開心,而我真係唔知幾多年無瀡個滑梯。做咗人父母真係啲童真返晒嚟!

「滑梯」

我諗八十後嘅朋友都應該記得我哋以前玩嘅滑梯同而家好唔同。以前嗰啲高好多,而且唔係而家咁用膠做。好多都係鐵架做,而天氣熱啲嘅時候真係會好鬼熱,瀡都瀡唔到。而相比起而家嘅滑梯真係分別好大!唔知點嘅總係覺得以前個啲滑梯好玩啲。仲記得有時會係上面放車仔,碌啲波落嚟。係香港真係唔知仲可以係邊樹搵得返嚟啲滑梯。如果有嘅話麻煩通知聲!