七個月


個人分享
Tagged With: , , , , , , , , ,

「記錄」

點解經常會寫關於自己個仔嘅生活趣事,其實係因為想等自己老咗之後可以睇返佢細個嘅嘢,真係怕有一日自己腦退化,乜都唔記得。所以有時一諗起都想寫底佢嘅成長過程。依家佢最好笑個位係以為自己識得企係度,但係佢連爬都未識,係度彈下彈下,好好笑。而因為開始食固體食物,佢一食到啲唔鍾意食或者奇怪嘢都會整個好好笑嘅樣話比我哋知佢唔鍾意。

「成長」

今日係郭大少出世七個月,當然佢識嘅嘢又越嚟越多,對所有嘢都非常好奇。而家幫佢換尿片真係要快快手,因為佢轉身嘅速度真係非常之快。之前我哋仲擔心佢唔識轉身,依家真係叻到爆。而郭大少最叻嘅地方就係一出街見到人都會主動撩人玩,一見到人就出佢嘅絕招!笑!所以搞到好多人以為佢好易湊,但係佢頑皮嘅一面就真係得我哋知!

「回憶」

雖然好唔捨得郭大少仲睇得咁快,但係每次佢係我懷抱中瞓著咗個樣真係甜到入心。因為知道自己比到佢安全感,所以好多時我都忍唔住拎個手機出嚟影低佢。依家郭大少好鍾意自拍,所以有時都同佢兩父子玩自拍,等我老咗嘅時候睇返我同佢嘅親子時間。不過除咗影相之外,我都唔會比佢玩電話,因為真係一去無回頭,我唔想好似有啲家長咁一出街就開部電話俾啲細路。