重組中

「盡做」

之前都分享過雞同雞蛋嘅問題,而每一年都希望可以向前行。要做嘅嘢實在太多,但係人手永遠係一個致命傷,更何況人一日嘅時間有限。就算好好管理自己嘅時間,往往都會被其他人打亂自己。我都好希望自己識分身術,好讓自己係每一個範疇做得最好。不過月有陰晴圓缺,人有旦夕禍福,世事豈能盡如人意,但求無愧於心。所以盡做啦!

「重組」

好多時所謂嘅重組,其實係將一貫嘅做事方法完全推翻。有啲人或者會覺得係今日的我打倒昨天的我,不過因為往往到咗樽頸位嘅時候,就算你絞盡腦汁其實都唔會帶嚟任何突破。所以可以話係再一次推自己離開安全網嘅範圍。當然好多時會因為某啲歷史遺留嘅問題而要瞻前顧後,不過事實係無一間公司係可以永恆不變。時間巨輪只會慢慢將你淘汰,一成不變只會變成慘淡收場。

「旅程」

不論重組嘅結果係點,過程係一個艱苦嘅經歷,因為要面對好多不明嘅因素。雖然自己之前係大公司試過好多次嘅重整,心理上其實好明白,但係實際上又係另一回事。唯一可以做嘅就係見步行步,聽日嘅事邊個會知道。淨係希望今年有改變,無論好壞都唔緊要,因為每一次嘅重整當中都係會學到一啲新嘢。

(Visited 52 times, 1 visits today)