有蛋先

「雞蛋」

其實呢個世界有蛋先,定係有雞先?呢個謎團真係好難拆解!就正如創業一樣,有時係好難好理性咁去做一啲決定。例如請人先定搵客先,無穩定嘅收入來源又點可以請人?但係當你有生意嘅時候先至請人,個陣時又未必請到合心水嘅人才。所以真係針無兩頭利,向左走定向右走,有時真係搏一搏。博贏咗當然係好,但係真係當買六合彩一樣好難講!

「創業」

當你自己開始創業嘅時候都會遇到好多難題,好多時都係膽量問題。我一般都會好小心,尤其係投資方面。雖然話做服務性質嘅工作,但係始終有一定嘅風險。就算你有把握搵到客戶,但係你可以保證客戶會跟你一世?好多時連客戶自己都身不由己,因為好多嘢都唔係佢哋控制範圍之內。所以幾時投資,而投資完係唔係一定有回報?真係無人可以寫包單!

「決定」

過去幾年我都會好堅持雞同雞蛋呢個問題,因為我真係冇乜膽量。人大咗顧慮多咗,真係冇辦法可以好似後生嘅時候咁豁出去。後生嘅時候真係掛個勇字喺心口,有前冇後打死罷就!但係當人大咗,好多時都會用一個好理性嘅態度去做決定。甚至乎思前想後都冇一個定案!不過今年真係希望有少少突破,所以一將功成萬骨枯,去到盡,博一鋪大嘅!

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.