大哥大


個人分享
Tagged With: , , , , , , , , ,

「家貓」

係我屋企除咗老婆同郭大少之外,好多有留意我嘅文章都會知道我屋企其實仲有兩隻貓。而大佬啱啱過咗佢十四歲嘅生日!係我屋企其實佢先至係最大嗰個,就算係郭大少都只係屋企排第三。上年雖然大佬身體唔好,又要剝牙,又爆肛門線,搞到我哋心都痛埋,但係最終都無事好返,所以我哋都安心啲。只不過上年郭大少出咗世之後,我哋少咗陪佢玩,好似有啲忽略咗佢咁。

「大佬」

我家大佬又大一歲啦!希望你今年健健康康,快快樂樂,繼續陪伴我哋同照顧細佬!不經不覺已經十四歲,雖然大佬係老婆由細養大,而我只係五年前先開始有你陪伴左右,但係真係好多謝你喺我哋身邊,因為你帶咗好多歡樂俾我哋。見到你健康已經好足夠,希望細佬好快可以同你玩啦。有時真係對你唔住,因為要照顧細佬,希望遲啲可以有多啲時間陪你啦!

「家人」

有啲人會覺得養寵物係好平凡嘅事,但係對我嚟講佢哋係屋企人。好多時都會係網上面見到有啲虐待動物嘅新聞,而我真係唔明點解啲人可以咁殘忍。如果你想養寵物嘅話,我會叫你諗清諗楚,事關係一世嘅責任,就好似你自己嘅仔女一樣。如果你仲未準備好嘅話,咁就千其唔好養任何寵物,以免害咗佢哋。希望大佬繼續開開心心,一路陪伴我哋同睇住細佬成長。


Also published on Medium.