請人難


個人分享
Tagged With: , , , , , , , , ,

「人才」

今時今日請人真係同搵老婆無分別,當然你揀人時,人亦揀你。要搵到志同道合真係難過登天。好多時就算你肯出高啲嘅人工都未必請到人,所以人工越搞越貴,根本離晒地,非常唔現實。最大嘅問題係好多時獅子開大口,或者係企業只要有人就要,令到一班根本能力未達水平嘅人心高氣傲。好多公司都因為急於要人,所以搞到整個市場超級混亂,周圍搶人!

「請人」

過去一年一直都想請人,但係人才呢家嘢真係可遇不可求。見過好多年輕人,但係感覺都係一般般。當然我唔係要一個超人,只不過面試完之後整體上未必適合做數據分析。或者係同香港嘅教育有關,令佢哋面試嘅時候只係一板一眼,當你問佢哋一啲無準備過嘅問題,一般都發揮得麻麻。而要入數據分析嚟行,最緊要嘅係承受挫敗,要捱更抵夜同重複做好多厭惡性嘅工作。

「要求」

講真我搵人得幾個原則,如果你覺得你適合又啱聽嘅話,不妨話我知。首先真係要捱得,因為無一份工係唔使捱。要主動好學,唔識嘅就去問,自動自覺去學,唔係坐係度發霉。持有開放態度,食得鹹魚抵得渴。有上進心同睇長遠,唔係急功近利。對數據要有熱誠,不斷發掘新事物。當然最緊要係有團隊精神,共同進退!其實我要求係唔係太高呢?我想講,我以前同依家嘅團隊個個都係咁!真係我要求高咩?非也非也!

(Visited 472 times, 1 visits today)

Also published on Medium.