好鬼攰


個人分享
Tagged With: , , , , , , , , ,

「搬屋」

搬屋真係一件好鬼攰嘅事,係咁執嘢,係咁入箱,係咁封箱,係咁搬嘢,之後又係咁開箱,係咁執嘢。過去嗰幾日我同老婆真係命都短幾年。除咗執屋之外,仲要搞郭大少嘅係佢飲食。唔知點嘅最近好唔聽話,係咁要人抱,變咗隻樹熊,一直攬實你。如果唔係就係咁發脾氣,係咁喪喊,搞到老婆無得執嘢。唔知係唔係因為新環境,所以未習慣呢?

「好攰」

講真我好少搬屋,對上個次真係好多年前,因為我好怕搬嘢。其實係唔係有專業服務幫人執嘢嘅呢?本來真係以為屋企唔係好多嘢,點知超出晒我同老婆嘅預期。慶幸有啲嘢唔使點執,之不過都已經攰到爆。依家我淨係希望將舊屋嘅嘢咋咋臨搬走埋,之後可以專心整理新屋。不過我睇怕都需要一段時間,希望農曆新年前新居可以搞掂晒,等我哋可以休息下。

「地址」

當然搬屋另外一個問題就係要改好多好多嘅地址。因為而家仲有好多信,但係當我哋大部份已經有電郵嘅時候,係唔係可以完全唔使寄信呢,一來浪費紙張,二來又唔環保。但係最大嘅問題係要係咁打電話同填表改地址!唔真係唔明點解唔可以用網上平台或者電郵一次過搞掂。香港好多機構重要人哋去填表,認真麻煩。而家係二十一世紀啦,可唔可以與時並進啲呢?

(Visited 80 times, 1 visits today)