一路帶

「施政」

又係一年一度嘅施政報告,咁今年又有乜嘢好關心?當然第一係講咗好多年嘅免費幼稚園教育,跟住就係創意科技有關嘅政策,之後當然係經濟。我諗最多人關心嘅應該係同房屋方面有關嘅政策。不過今次嘅施政報告好明顯係為咗配合中國嘅「一帶一路」。而「一帶一路」係指「絲綢之路經濟帶」同「二十一世紀海上絲綢之路」,基於古絲綢之路但又不限於歷史上絲路路線嘅新型經貿帶。

「關心」

做咗人哋嘅父母當然自自然然會關心多咗施政報告入面嘅教育部份。雖然個仔未到適學年齡,但係免費幼稚園教育真係一個好貼身嘅問題,只不過係唔係真係完全免費呢,其實好似唔係囉。而係創科嘅政策又係無乜特別,因為邊個會去到數碼港租辦公室?真係貪佢方便咩。而嗰個創科創投基金,咪俾我睇死,到最後都係自己人玩晒。不過最爆嘅係特首不斷講「一帶一路」,真係煩到無朋友!

「帶路」

講真好多人都唔會知道乜嘢係「一帶一路」,但係特首又係咁講,係咁講。樣樣嘢都「一帶一路」真係有啲覺得有少少施政傾斜。其實就算你知道乜嘢係「一帶一路」或者你都會有一個感覺,就係好概念!唔知幾時香港嘅政策係要配合「一帶一路」,而且仲要成立「一帶一路督導委員會及辦公室」!真係有嚟個需要?又係一個諗唔明嘅問題!

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

 
  • 暖化中全球暖化問係越嚟越嚴重,好多時睇新聞都會用百年一遇嚟形容不同嘅極端天氣。好多人都會覺得全球暖化關自己咩嘢事,甚至乎覺得唔會影響到自己。所以無人會理會我哋生活緊嘅地球其實已經病入膏肓。仲以為有生之年唔會有問題?咁就大錯特錯!如果北極圈嘅氣溫可以達到三十度,咁你諗下啲冰會去晒邊?除咗水位上升之外,海水嘅鹽份降低,導致極端天氣越嚟越頻繁! Click to share on Facebook (Opens in new window)Click [...]
  • 盧凱彤其實睇到新聞嘅時候真係好呀愕然,起初以為自己睇錯,但係當不同嘅媒體都開始報導嘅時候就知道佢真係離開咗。盧凱彤係一個我好欣賞嘅音樂人,好多時睇演唱會都會睇下係唔係佢彈結他。或者大家對佢嘅了解唔深,甚至乎佢唱過啲乜嘢歌或者患有燥鬱症都唔知。有時看似一切都正常,但係有時正常就正正係唔正常。你辛苦了!雖然係一個好難接受嘅事實,但係相信大家都會尊重你嘅決定同永遠記得你! Click to share on Facebook (Opens in new window)Click [...]
  • 三歲了眨下眼郭大少就已經三歲了,當然今日要同佢慶祝啦。一起身同佢去上音樂堂,之後就去咗啟德嘅一間親子餐廳玩,然後再飛入去迪士尼睇巡遊同玩咗陣,因為夜晚同屋企人食飯慶祝。依家啲小朋友真係幸福,不過都係希望佢有一個開心嘅生日啫!見到佢健健康康咁成長,每日燦爛嘅笑容,其實就已經好足夠。不過時間真係過得太快,由一個嬰兒搖身一變,變成一個小朋友! Click to share on Facebook (Opens in new window)Click [...]
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。 Click to share on Facebook (Opens in new window)Click [...]