失咗蹤


個人分享
Tagged With: , , , , , , , , ,

「自由」

講真邊個會相信香港回歸之後會五十年不變?如果相信嘅話,一係佢哋就係親中派,一係佢哋就係嗰班「港豬」?香港慢慢已經變成好多人唔認識嘅地方,因為慢慢我哋失去咗香港嘅核心價值!自由其實係得來不易,只不過要失去亦都好容易。你以為好多未必可能係香港發生嘅事同物,分分鐘都會發生。因為我哋已經再唔係生活係我哋長大嘅地方「香港」,而係慢慢被一個獨裁而無自由嘅政府侵蝕。

「失蹤」

諗咗成日我都係諗唔明點解一個人可以無啦啦係香港失咗蹤,但係之後又會用中國電話打電話再用普通話報平安,而警察話佢根本無出過境,咁你話係唔係好鬼奇怪?當然你可以話香港話大唔大,話細唔細,唔見咗個人有乜嘢出奇,事關都唔知去邊度搵。況且年中都唔知有幾多失蹤人口,而佢哋如果連個人根本都唔係香港嘅話,真係唔知去邊樹搵返個人返嚟。不過今次銅鑼灣書局件事真係好可疑!

「問題」

雖然唔知嚟單新聞可以維持到幾耐,因為香港人嘛,大家都好善忘。但係睇完單新聞之後,有幾多人會醒覺?當然親中派係永遠唔會醒,不過班港豬呢?繼續扮無知,扮純情?當然我唔會介意,因為呢啲問題其實預咗架啦。講一國兩制就好容易,但係五十年嘅一半都未過已經變成咁。我唔會同唔想去想像,因為到時候我已經老啦,只不過我哋嘅下一代會點呢?我哋長大嘅香港會點呢?