新一年


個人分享
Tagged With: , , , , , , , ,

「迎新」

送舊迎新,今日一月一號正式踏入二零一六年嘅第一日,每年都一樣希望大家身體健健康康,因為無嘢緊要得過健康!唔知係唔係因為人大咗加上今年有咗郭大少嘅關係,雖然唔會好似以前咁同一大班朋友出去倒數嚟迎接新一年,但係今年唔知點解好多嘢都無咩嘢準備,平平淡淡咁就過咗。不過都係一件好事,新一年真係想啲嘢慢啲,唔好趕頭趕命,等自己有多啲思考嘅空間。

「框架」

今年第一篇文,反而唔知應該寫啲乜嘢好,年年都係度講今年嘅目標係乜乜乜,真係會唔會有啲悶呀?所以今年我決定目標係無目標,等二零一六帶我行今年應該行嘅路。以往成日話俾乜乜乜目標自己要係今年做到,但係嚟個又係一個自己設定俾自己嘅框架。我唔鍾意框架,因為框架就等同無突破。希望今年係一個無制定模式,無框架嘅情況下成長,嘗試另一種生活態度!

「目標」

老實講都已經三張幾嘢,再過幾年都已經四張嘢,仲講乜鬼人生目標呀。當然唔係話冇目標,但係只係覺得要開始用另一種思想模式去達成目標。以前後生你或者會好直接講我今年要點點點,人大咗有時就想改變自己睇嘢同諗嘢嘅角度。講到尾每樣嘢都係可以自己揀,但係唔係每樣嘢都會揀得啱。就算揀唔啱又點?繼續用我嘅座右銘:「生命不在乎長短,只在乎精彩」。

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.