好痴線


個人分享
Tagged With: , , , , , , , , ,

「教育」

當自己做咗人哋嘅父母之後,就當然更加關心香港嘅教育制度。而今時今日嘅香港,如果要自己個小朋友有個好環境去讀書真係唔單止攞自己嚟搞,甚至係攞啲小朋友嚟搞。除咗依家大家討論緊嘅「全港性系統評估」之外,其實成個入學過程都係匪夷所思。根本上係要好有策略先至可以入到心儀嘅學校,真係好痴線。真係睇現咗香港個社會幾咁有問題,而最大嘅問題始終都係我哋嚟班成年人,原因係我哋同佢一齊癲!

「痴線」

晏晝聽完老婆個朋友講完小朋友入學嘅一啲訊息,我只可以話好痴線。香港依家個教育制度真係扭曲到一個唔知點樣去形容嘅地步,唔單止混亂,而且非常複雜!其實都唔知係細路仔讀書定大人讀書。有啲又話要一出世就要報名,有啲又話要一條龍可以直升,有啲又話要搵地方搬等個校網好啲。你話係唔係人都癲?講真讀書啫,使唔使搞到咁複雜呢?

「讀書」

其實點解讀書都好似打仗咁呢?講真我覺得真係制度嘅問題,如果唔係點解要啲家長通宵排隊?有啲人話咁先有誠意!哈?其實係我讀書定係個仔讀書?乜讀書都要有關係,要奉承嘅咩?乜嘢世界呀?雖然學校係有佢哋自己嘅收生標準,但係真係匪夷所思。教育嘅原意其實係培育下一代,而因為某些原因例如家庭背景而影響學校取錄一個小朋友,咁未免有啲歧視嘅成份。你又點知佢將來會點呢?

(Visited 173 times, 1 visits today)