港教育


個人分享
Tagged With: , , , , , , , ,

「感受」

過去幾年一路都有喺大學教書,如果你問我現今香港嘅年青人係點?我只可以話香港嘅教育制度害咗佢哋,雖然唔係香港好多年,亦唔係太關注香港嘅教育制度。但係短短四五年係大學教書就已經感受到個問題!當然香港嘅問題唔單止係啲乜嘢評估咁簡單,因為除此之外仲有之前啲所謂「中中」同「英中」到而家嘅「三三四」其實都玩死咗好多學生,令我哋損失一整代嘅香港人!

「評估」

之前因為一直做緊區議會選舉嘅分析,所以仲未寫最近期大家討論嘅「全港性系統評估」。如果你問我就當然反對啲小朋友要為咗呢啲無謂嘅評估要俾學校利用。更何況嚟個評估已經淪為學校與學校之間嘅評估,而評估完之後教育局其實做過啲乜?雖然話就話學生唔知成績亦唔會用嚟評估佢哋,但係學校嘅角度就好唔一樣。點解學校要操練學生?好明顯個原因係學校為咗自己個名多過學生嘅能力!

「問題」

我哋成日話香港有怪獸家長,其實點解?我反而諗除咗家長本身緊張小朋友至外,就係因為學校本身嘅入學要求簡直係嚇死人,因為分分鐘變態過我去見工!而學校變成咁,好明顯就係教育制度衍生嘅問題。政策不斷改,制度又係咁改,用過時嘅填鴨式教學方法,無長遠策略。最終受害者係我哋嘅下一代!老實講我真唔係太希望自己個仔係啲咁嘅制度下成長,因為我知會害咗佢!