九龍西

「概況」

好啦之前搞完港島區嘅資料,終於到九龍西。相對港島區,九龍西少一個區但係都要搞好耐。先講返啲基本資料,選區數目有66個,參選人有155個,平均2.3個人競爭1個議席同香港島差唔多。今次投票率係43%,合共208,918張選票。建制派票數比民主派多12.9%,而選票比例係1.29:1。而平均每個選區重奪議席嘅話,民主派平均需要889標。民主派係九龍西有27%議席,而建制派嗰73%議席入面有12.5%係自動當選!

「分析」

『油尖旺』
1:嚟個區有少少似灣仔區,都係建制派主導同投票率係九龍西最低37.74%。
2:櫻桃同大南都有民主派爭票,但係大南其實如果合併嘅話係會贏建制派(建制 1424:1568 民主)。
3:嚟個區嘅落選差距比較高,平均每個落選嘅選區有成 40%。
4:民主派其實落選嘅票數差距比建制派好少少,平均候選人嘅票數差距係(建制 665:651 民主)。
5:有幾個地區嘅差距係20%內,所以民主派可以重點注意富榮,大角咀南,旺角東,尖東及京士柏。

『深水埗』
1:係西九龍唯一無自動當選嘅選區,亦係同建制派抗衡嘅選區,因為建制派淨係多一個議席(建制 12:11 民主)。
2:民主派係深水埗區得票同落選差距係九龍西最細,所以要加強防衛同進攻。
3:大部分落選嘅地區嘅差距相當之高有成45%。所以好明顯嗰啲選區係建制嘅根基。
4:今次最大鑊嘅係有三個選區自己打自己。分別係長沙灣,麗閣,美孚南。
5:如果長沙灣同麗閣嘅民主派票數加埋,其實已經足夠攞到議席,奈何內訌。

『九龍城』
1:嚟個區係建制派嘅重要陣地。事關民主派得票嘅差距係選區入面最大。
2:不過雖然選票上差距大,但係落選候選人嘅票數差距比深水埗細自由35%。
3:當然重點係馬頭圍,常樂,黃埔東,紅磡灣,落選差距係 15% 內。
4:如果紅磡灣嘅民主派票數加埋,亦都係足夠攞到議席。
5:而九龍城區同油尖旺區都係有三個區自動當選,應該搵人去參選。

「總結」

九龍西整體仍然係建制派主導,當然有好幾個地區如果唔係民主派內訌,其實已經可以多一兩個議席。而家民主派係九龍西佔27.5%嘅議席,不過建制派有6席係自動當選。民主派一定要減少內訌,因為有啲區真係輸得唔抵。雖然深水埗係做得比較好,但係平均每個落選嘅候選人大約相差153票,比起香港島多54標。而計得票數度嚟講九龍西兩派得票差距相對比香港島好6%。真係可以係下屆加把勁!

(Visited 52 times, 1 visits today)

Also published on Medium.