一念之


個人分享
Tagged With: , , , , , , , , ,

「一念」

一念天堂,一念地獄,一念之間,一念之差。世間係平衡嘅,有得必有失,有苦必有樂,有愛必有恨,有因必有果,有高必有低,有多必有少。世間嘅遊戲規則,就係咁樣,患得患失,似有非有,總係撲朔迷離。竟然係咁,又何必執著呢!世間上好多嘢都係虛幻,有形無實,就好似火咁樣,看似有形,但係你能將佢一手抓住嗎?當你要執著咁抓住佢,你已經葬身火海。

「決定」

好多時做決定真係一念之間,可以係好,可以係壞,可以改變好多嘢。不論個刻嘅念頭係點樣都好,決定到最後始終都要做。當然好多人有可能會話念頭嘅嘢一瞬即逝,衝動做決定好多時會後悔收場。但係世事好多時都係因為一念之差而改變,不過真係樣樣嘢都可以等你深思熟慮先做決定?現實係好多時你都無咁嘅時間同空間去比你諗清諗楚。但係只要忠於自己,無論結果係點都好,就已經足夠!

「心態」

雖然我好每日都係對住啲數據,而我亦都好相信數據,但係好多時都會做一啲一念嘅決定,只不過我做完之後無論結果如何都唔會後悔就得!因為所有嘅仇恨,悲苦,愛情,快樂,孤獨,傲慢,等等,所有嘅心態,都係有形無態,無法用科學去量度或鑑証。你想有每日嘅日子點過,其實好睇你每一個念頭。係喜,係悲其實係自己掌握。所以講到尾都係保持正面嘅心態最緊要!