大癱瘓

「機場」

雖然係好多地方,機場都係位於城市比較偏遠嘅地方,原因通常係因為安全問題。但係有幾多個國家嘅機場好似香港咁得一條陸路連接市區?同時通往市區嘅鐵路都係要經過汲水門大橋同青馬大橋,所以當遇到事故嘅話真係無辦法由陸路去機場。咁仲有乜嘢方法?就係搭船去,只不過有幾多人知道點樣由水路去機場?相信經過昨晚懷疑有船撞到汲水門大橋令警報響起,所以青馬大橋要全線封閉同緊急檢查汲水門大橋。

「封橋」

相信無人會諗過香港因為一條橋搞到交通大癱瘓!其實要封橋,相信係基於安全理由,但係亦因為今次嘅事故,大家再一次討論點解香港係得一條路來往香港機場?因為今次事故,出又出唔到,入又入唔到,搞到個個都唔知點算好。最大鑊嘅就係連機場快線都要被逼停駛,相信會搞到好多人趕唔到飛機。除非你去中環搭船到愉景灣或者梅窩,再轉其他交通工具去機場啦,否則真係呆等!

「應變」

因為今次事件,青馬大橋上下層行車線、港鐵機場快綫及東涌綫都要全面封閉。事關為嚟條係連接大嶼山同市區嘅唯一通道,所以青嶼幹線塞滿晒車,交通足足癱瘓咗兩個幾鐘,攪到好多人有家歸不得。最離譜嘅就應該係路政署,有乜可能無應變措施?要差唔多條路開返先至發新聞稿,真係唔該晒!如果無咗條橋嘅話,香港係唔係等同廢咗?又少船,有無其他陸路可以去大嶼山,咁當初係唔係要起條海底隧道會好啲呢?

(Visited 90 times, 1 visits today)