攞嚟賤

「自在」

好多人話創業,做老闆係希望可以舒服啲,唔係再睇人面色,可以自己話晒事。不過當自己真係開一間公司嘅時候,你就會發現事實並非如此。其實你同一個打雜係無分別,樣樣嘢開頭都要做。平時返工都仲可以話有得收工,返到屋企乜都可以唔使諗,因為打份工咋嘛。當然要上位就另計啦,不過自己做老闆就預咗無收工嚟樣嘢,甚至唔好話放假去旅行。因為好多時手停口停!

「犯賤」

有時都唔知係唔係自己犯賤,係大公司做得好好地,有老細賞識,有好多唔同嘅機會,有一個二百幾人嘅團隊,不時可以周遊列國增廣見聞,點解自己有自唔在攞苦嚟辛?仲無啦啦走去創業,咁之前所花嘅時間,青春同精力,好似一次過無哂。辛辛苦苦係一間公司工作咁多年,默默耕耘去到可以管理一個部門,講真有時我都唔捨得,所以話自己係唔係犯賤呢?

「目的」

其實諗返點解當初開而家間公司去做數據分析,原因係因為睇到市場有嚟樣需要。同時有時諗如果自己係一間大公司可以做到嘅嘢,自己係無一個品牌同其他嘅輔助之下,單憑自己嘅能力可以做到同樣嘅成績嗎?同時大家都知道每個工種都有薪酬嘅頂點,尤其係大公司,所以要突破嚟個樽頸位除咗炒股票同炒樓此外,我諗自己創業係另一個選擇。講到底都係想試下自己有幾多斤兩!