人大咗


個人分享
Tagged With: , , , , , , , , ,

「思想」

我相信好多人長大咗之後都會諗如果自己仲係細路仔嘅話幾好呢!因為人大咗,諗野多咗同複雜咗,好多嘢都要簡單複雜化。當然而家嘅香港嘅細路仔未必好似我哋以前咁簡單,咁單純。有時真係單純啲好,唔駛思前想後,開開心心又一日。所以有時係因為自己諗多咗而令自己越嚟越唔開心又何必呢。但係人大咗就係咁,諗左諗右,諗前諗後,真係遲早諗壞個腦!

「煩惱」

人越大,煩惱就越嚟越多!點解?其實無他嘅,事關好多時係自找煩惱。當然有啲煩惱係無可避免,因為係大環境嘅問題,不過有啲就自己搵上門。而大部份嘅人通常都會為起居飮食而煩惱,同時當大家踏入唔同嘅人生階段都會遇到唔同嘅煩惱。只要用正面嘅態度去面對唔同嘅煩惱,啲問題就會好自然咁慢慢遠離自己。如果不斷抱著負面情緒,咁就好難解決問題。

「顧慮」

後生嘅時候真係有前無後,打死罷就,顧慮亦比較少。但係當你有咗自己嘅屋企,顧慮就會越嚟越多,而顧慮亦會改變一啲人生嘅決定。就好似創業咁,越後生,越早開始,重新起步嘅機會越多,顧慮相對比較少,做嘅決定亦比較大膽同承擔失敗嘅能力亦比較高。依家行嘅每一步,做嘅每一個決定都步步為營,因為一子錯滿盤皆落索。所以樣樣嘢都要瞻前顧後。


Also published on Medium.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.