港落後

「落後」

之前有報道指香港嘅八達通落後,亦都見證到香港停滯不前!而近日好多身邊嘅朋友都係到講支付方法,其實老實講香港喺好多方面都好落後,唔單止支付方式咁簡單。當然所有嘅香港企業都係睇回報,而好多時都唔會做白老鼠。其實五年前返到嚟香港做嘢已經覺得香港得個殼,虛有其表,外表風光,內裡坎坷。你以為香港好發達,其實好多嘢都係歷史文物!

「香港」

香港落後唔係無原因,其實由教育開始已經有問題,而整體嘅環境就係少做少錯,唔做唔錯。好多嘅網頁真係十年不變,單睇政府個網站就知。本地公司好多講就講重視科技,但係一講到投資其實就話嚟樣貴個樣貴,到最後一塌糊塗,變咗個爛攤子!至於一般市民就有個慣性,根本唔想變,用慣咗就賴死唔走,唔肯接受新事物。所以如果唔係強制性嘅話,要香港變?我諗都幾難!

「科技」

雖然大家討論嘅係電子支付模式比較多,講真俾錢嘅嘢真係好睇個人習慣同邊個去推動件事。如果商家唔配合,你認為今日八達通會咁普及?其實講到尾都係錢作怪。就算香港人手上面有幾多部新嘅手機,如果無其他硬件配合其實等同一把未開封嘅寶劍一樣,英雄無用武之地!所以唔係科技嘅問題,唔係我哋技術落後,係思想落後同保守先至真!仲有就係個政府,下下得個講字,有心嘅就應該搵啲後生嘅搞科技產業啦!

(Visited 104 times, 1 visits today)