港渡輪

「渡輪」

香港其中一個特色就係有一個好靚嘅維多利亞港同沿岸嘅景色。不論係日頭定夜晚,各有各嘅風味。而除非你好有錢擁有有隻遊艇,如果唔係其實好難會無啦啦係個海上面觀賞香港嘅景色。咁當然仲有一個方法就係搭天星小輪係香港中環碼頭去尖沙咀碼頭或者反方向都得。係海上嚟觀賞香港嘅景色係有另一種風味,因為係香港獨有,而係其他地方或者國家都無嘅景色。

「維港」

我其實幾鍾意搭渡海小輪,而一上船就當然揀個窗邊位,因為可以靜靜地睇下維港兩岸。但係而家維港就越嚟越大浪,同時唔知係唔係填海填多咗,感覺中環同尖沙咀嘅距離好似短咗,所以係渡輪上面觀賞香港嘅景色嘅時間少咗。其實如果係碼頭附近而要過尖沙咀,分分鐘坐船過海仲快過搭地鐵。當然如果要專程行去嘅話,其實都幾鬼遠。不過香港嚟果個特色又真係幾獨有。

「遺憾」

我諗最遺憾嘅就係無得再係紅磡碼頭搭渡海小輪返中環,因為我諗得過條航線先至可以睇到大部份嘅香港都。以前去見客,如果佢哋係黃埔果邊,我通常都會選擇搭船過去,因為可以忙裏偷閒,當遊船河。有時吹下海風,都幾舒服,而且又可以令自己慢返落嚟。所以而家無咗一個平價嘅方法去欣賞我哋咁靚嘅香港。希望有日會有啲新航線可以等大家在一次漫遊嚟個維多利亞港啦!