親手湊


個人分享
Tagged With: , , , , , , , , ,

「全職」

雖然話好多嘢都無兩全其美,但係你嚟刻問我嘅話,我仲係希望可以一手湊大個仔。因為時間過得好快,而啲細路仔真係日日都係到變,所以希望有多啲時間係佢身邊。如果我仲係大公司打工,我諗我唔會有時間陪佢,而之後就會好後悔點解我無係佢嘅童年陪伴佢一齊成長。雖然我選擇咗嚟條路,而條路我知道會難行好多,但係最起碼我試過,如果唔得都無辦法,只好搵其他辦法。

「嘗試」

今日係老婆放完產假之後第一日返工,亦都係第一日自己全日要睇住個仔。因為上個星期個仔經常扭計,搞到老婆病咗,而且佢經常訓得唔好,郁啲都會醒,醒完就爆喊,真係兩個人都搞佢唔掂。今朝一早老婆餵咗奶之後先返工,之後好彩個仔瞓得返,之後佢起身就餵佢食奶。好彩今次扭咗陣,都唔係搞咗太耐。到咗晏晝就同佢沖涼,兼且預先暖返啲奶,等佢沖完涼就即刻有得食。今次食完就瞓,真係托賴!

「分別」

我諗每個細路仔都希望自己父母係佢身邊陪佢而唔係得星期六日先至有時間陪佢。我經常同老婆講,其實個仔遲啲大咗,你要陪佢,佢都未必俾你陪。所以而家錯過咗以後你想追返到無嚟過機會。至少我覺得自己湊同搵工人或者長輩湊係有好大分別,事關真係講到仔女同自己嘅關係有幾親切。我只係唔想個仔有乜事嘅時候,佢淨係會搵工人或者長輩,而非自己。所以而家有得黐住個仔就好黐住啦,大咗佢就會黐住老婆㗎啦!

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.