雨過後

「雨傘」

今日係雨傘運動嘅一週年,相信好多人都唔會忘記嚟一日。對於香港嚟講,係一個歷史嘅日子。其實到咗呢刻我都唔係太相信香港政府竟然係一年前出動防暴警察去驅趕手無寸鐵嘅市民。而經過咗七十九日嘅雨傘運動,香港人最後得到啲乜?其實係政制上冇乜大嘅改變,就算最後政改因為建制派嘅蝦碌事件導致無法通過,好多香港人其實仲未醒覺。當然會唔會再有同樣嘅抗爭?我諗好難再有咁嘅機會。

「紀念」

好多人都會話要紀念雨傘運動,但係點解要紀念呢?因為運動只係一個開始,而最緊要嘅係運動背後嘅意義。同時其實個運動從來無結束過,因為大家好似過返所謂嘅正常生活,事實上大家都用緊唔同嘅方式去繼續抗爭!只要毋忘初衷,記住當初我哋點嘅會行出嚟就得。就算而家經過每一個據點,都會諗起當日我哋香港人有幾咁團結,亦都重現香港嘅核心價值。

「後感」

係運動期間,自己就發起咗「雨。感受」。雖然無達成目標收集五百篇,甚至連想出書都最終搞唔成。但係又係度諗,唔知有冇人想寫「雨。後感」。因為已經過咗一年,唔知之前寫過「雨。感受」嘅朋友嚟刻又有乜嘢感受嚟?無論「傘」前「傘」後,個「傘」字入面係有好多人!而要爭取香港民主,公平,公正,公義,其實仲有好長嘅路。只可以係度講多次『毋忘初衷』!

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.