三字頭


個人分享
Tagged With: , , , , , , , , ,

「生日」

唔經唔覺又一年,咁又大咗一歲,不過今年生日當然好唔同,多咗個仔陪我過生日。真係唔經唔覺已經唔再係三字頭,好快就過咗人生嘅一半。以前生日好似好大件事,而家真係是是但但咁過,因為其實人大咗就覺得都係同平時一樣無乜分別。話雖如此,生日最希望就係有老婆同個仔係身邊就好足夠。知足常樂,人生起起跌跌,有得有失,繼續平常心去面對下半生,要學識放得開,放得低。

「一年」

今日除咗係生日之外,一年前開始寫嚟個博。唔經唔覺真係寫咗一年三百六十五日。自己都有啲震驚,竟然可以寫足一年,堅持日日寫唔俾自己有藉口斷。當然間唔中會被人鬧浪費時間,但係寫咗一年,除咗可以將自己嘅睇法同諗法做個記錄之外,其實仲有一樣嘢我好少分享。呢樣嘢就係寫文俾咗我學多嘅數據,而亦因為嚟個咁特別嘅環境俾我學咗好多嘢!希望嚟本日記可以繼續落去!

「願望」

當然大家會問我生日願望係乜?都係果句啦,唔死得就已經好滿足。當然除此之外就當然希望身邊個兩位可以開開心心咁過每一日。只要可以見到老婆開心,可以睇住個仔一日一日長大,同枕邊人白頭到老,咁就已經夠晒啦。另外就係希望堅持做數據咁多年,真係可以係未死得之前睇到嚟個行業可以發展起嚟。當然而家多咗人識數據分析但係幾時先至可以同所謂嘅專業人士平起平坐呢?