小團隊

「工作」

唔經唔覺,出咗嚟做嘢已經第十幾年。而除咗有七年時間係大公司,同七年時間創業,亦都試過係唔同大細嘅公司同團隊做過唔同嘅職位。不過自己就好似比較鍾意三四十人嘅團隊,因為不論效率同關係都比較好。雖然每個人都希望有一個自己嘅王國,係大公司嘅時候我都係。但係當你有好多人要管理嘅時候,其實每日嘅工作係處理人事多過實事。所以要組一個好嘅團隊係十分之難。

「團隊」

最誇張嘅時侯,自己要管理二百幾近三百人,仲要兼顧海外團隊嘅運作,出去見客兼顧問。講真有時都幾吃力,因為好少時間同自己嘅團隊交流,了解實質情況。當然你可以話放手俾下面做,但係有時唔理解基層團隊需要等問題,往往就影響工作同團隊表現嘅原因。所以你問我希唔希公司好大,我諗我會話量力而為。因為有時大未必係好事,反而專注質量同真正幫到客戶,得到認同,我覺得更緊要。

「理論」

仲記得以前有個老細同我講過一個比喻,如果你要管理團隊,你就應該係司機,因為你應該係帶領團隊去到目的地嗰個人。如果你一直只係坐係乘客果邊,你其實只係搭緊順風車,就算行錯路你只可以坐係度乜都做唔到。所以我鍾意揸私家車因為我要靈活同要變得快,但係如果我揸巴士嘅話,就好難話變就變。不過點都好,為自己嘅目標進發,做好自己,公司大唔大唔係一個成功與否嘅指標!

(Visited 149 times, 1 visits today)