湊仔篇


個人分享
Tagged With: , , , , , , , , ,

「湊仔」

過去一個星期,兩公婆除咗湊仔都係湊仔。好乖個位郭大少突然唔見咗,當然佢繼續食,繼續瞓,同繼續扭計!有時都真係忙到出煙,尤其係我老婆。見到佢我都覺得辛苦,認真佩服餵人奶嘅媽媽!真心覺得你哋好勁!我老婆簡直就係同個香蕉枕二合為一。因為個仔係咁食,係咁食,老婆又怕佢唔飽。而郭大少唔夠飽就爆喊,等多陣都唔得,但係食兩食就好舒服咁又瞓得嗰一陣!好明顯就唔係十分飽啦!

「努力」

湊仔真係可以好忟憎,當然我老婆一定比我忟十倍。不過都見到佢好努力咁照顧個仔,有時自己忙到癲咗都唔忍心唔理佢哋。當然自己未必做得好好,不過真係希望盡量做好啲,減輕佢嘅負擔。我認真佩服有幾個細路嘅朋友,你哋真係好勁!遲啲真係要同你哋取下經!我而家得一個目標就係攪掂嚟個郭大少。不過每次見到佢同你笑,整個招牌酒凹,真係乜都抵番晒!希望佢快啲變返之前好乖嗰個郭大少啦!

「出街」

今個星期試過帶埋個仔出街,諗住兩公婆都好耐冇出去,就試下帶埋個仔去啦。雖然唔係好長時間,但係感覺就好似出咗去成日咁。出到街又要顧住啲盲毛,又要擔心個仔要食奶同換片,所以老婆話以後都係要點對點,唔好係條街到行。至於食飯,第一次就變左外賣返屋企,而第二次就兩公婆食食下諗住今餐可以有啖安樂茶飯食。點知郭大少突然醒咗,又要食奶。所以就滾水淥腳食完兼打包返屋企。真係一頭煙,哈哈!

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.