去見工


個人分享
Tagged With: , , , , , , , , ,

「見工」

今日見到前輩講開見工,所以又借題發揮下先。雖然我覺得好多時見工就好似一個問答比賽,係短短一兩個鐘,甚至經幾輪面試之後,大家吹完一輪水之後,就睇下人哋請唔請你,定你請唔請佢。當然感覺係最緊要,而有時係雙方面嘅角力賽。因為依家唔係你揀人,而係人都揀工。但係時下嘅年青人見工好多時都係利字當頭,而好多時會反問返你幾時升職加薪。講真,人哋都未話請你,咁樣反而俾人覺得你唔會做得長!

「面試」

當然我自己去見過唔少工,亦都面試過好多人。而好多時我請人都係憑感覺,就算你讀書幾叻都好其實我唔係太過在乎。反而我會留意你對自己有幾了解同係交談中係唔係做返自己。我真係好怕有啲不可一世,自以為是同太過機械式嘅對答。不過我好多時都好鍾意問呢個問題,就係你點樣睇自己。因為我覺得自我檢視同了解自己係好重要,因為咁先知道點樣發揮自己,如果唔係就好難進步!

「奇景」

當然聽過好多唔同嘅離奇面試故事啦。有啲未見工就問你人工幾錢。有啲問返你點樣幫佢,而唔係佢點幫公司。有啲索性放你飛機,連電話都唔打個。真係乜嘢人都有。甚至有啲啱啱畢業就教返你點做嘢,真係唔知好嬲定好笑!如果你有遇到唔同嘅經歷,我都好想聽下。最少可以同大家分享下你嘅經歷,等我哋遇到嘅時候知道點樣處理都好。我諗如果大家遇到咁嘅情況都未必會請嚟啲人!

(Visited 571 times, 1 visits today)