洪永城

「節目」

一路都有睇開洪永城主持嘅節目,而我自己覺得佢做旅遊節目係好過佢拍嗰啲電視劇。雖然有幾輯嘅旅遊節目佢同黃翠如兩個一齊做,但係始終覺得佢自己一個做得好啲。當然洪永城同黃翠如嚟個組合係幾夾,有時都幾低能同搞笑。其實之前《走過烽火大地》嘅時候都覺得佢哋幾博,事關去中東真係有啲危險,始終打緊仗嘛,而今次仲要去北韓?咪玩啦,分分鐘出唔返嚟!

「北韓」

今次講真,我覺得《在那遙遠的地方》無啲人講到咁,話乜嘢美化北韓。點解咁講,當然係鏡頭前面佢哋只可以拍到北韓大部份好嘅一面。而我覺得就當然唔可以反映到現實嘅全部,只不過你要記住佢哋全程有人跟住同睇住佢哋拍啲乜。所以唔可以咁斷章取義,其實如果有留意洪永城係節目入面,時不時都暗串緊北韓。講真如果俾人聽到分分鐘真係會扣留佢哋係北韓,唔知幾時先可以返出嚟!

「走過」

由《走過烽火大地》,《走過浮華大地》,《走過浮華大地-亞洲篇》,《走過足球聖地》到《在那遙遠的地方》,我個人都係鐘意佢自己一個人主持嘅節目。平心而論,真係都唔錯,至少唔可以話差。只不過係唔係因為個節目係無綫到播,所以先至引起咁大嘅迴響。雖然我覺得無杜如風嗰次咁大反應,但係至少我覺得佢真係幾夠膽,而今次認真係第一次因為有節目講北韓先至對嚟個地方認識多一啲。