腦朋友

「人生」

每個人由出世開始就慢慢懂得「喜怒哀樂」而不同嘅情感就隨著年齡開始慢慢發展。「玩轉腦朋友」正正講述每個人由出世開始到長大成人都由「快樂」,「悲傷」,「憤怒」,「厭惡」同「恐懼」組成再發展出唔同嘅性格同人生觀。當然人生有不同階段,所以慢慢由簡簡單單嘅生活,變得越來越複雜。雖然係一套卡通片,不過背後帶出嚟嘅信息,相信要大人先會深深明白箇中嘅意思。

「拍拖」

今日趁陪月仲有兩日係屋企幫手睇住個仔,我同老婆偷雞去拍拖睇「玩轉腦朋友」。因為好多朋友都話嚟套戲除咗係一套卡通片俾小朋友睇之外,其實大人睇完都覺得好好睇。好彩上咗畫都成個幾月都未落畫,只係美中不足嘅係睇廣東話版而唔係英文版。事關都真係就嚟落畫,無計啦湊仔緊要過睇戲。最多之後買返隻碟返屋企睇返英文版。因為始終覺得英文版先係原汁原味嘛!

「後感」

「玩轉腦朋友」貫徹咗 Pixar 一向嘅作風,除咗故事好睇之外,背後嘅訊息其實更有意義。人真係越大越多煩惱,情感變得越嚟越複雜,開心變得唔係必然。而且人隨著年紀,慢慢記憶會越嚟越模糊,只有一啲深刻嘅事同物先至會保存落嚟。嚟啲都係套戲入面一一反映出嚟。當回想戲入面嘅每一個角色嘅時候,都會諗下自己個仔會唔會好似阿樂咁時時刻刻都咁開心。為人十分樂觀積極同充滿正能量。