坐完月


個人分享
Tagged With: , , , , , , , , ,

「滿月」

今日「晞暘」滿月啦!話咁快就已經出咗世成個月,時間真係過得好快。日日對住佢都覺得佢大得好快,雖然做到無停手,但係見到佢開開心心,食飽好滿足個樣,真係幾忙都唔記得咗。而家肥返啲,越嚟越得意。得閒同你笑一笑,真係俾佢激鬼死。肚餓要食嘢就一秒都唔等得,係咁喊,有時喊到紅卜卜真係比佢嚇死!所以每次去到咁嘅位,一定要抱起佢氹返佢!

「出月」

我諗我老婆今日一定好開心,因為終於坐完月,放監啦!過去一個月對我老婆嚟講應該辛苦過陀住個仔咁多個月,因為仲多嘢要搞同好多嘢都仲係未食得。最最最辛苦嘅就係無得正常咁沖涼洗頭!所以今晚應該好開心可以回復返少少正常嘅生活!不過當然因為身體仲未完全康復,同仲要餵人奶所以仲有啲嘢要戒口。至少而家可以正常出街,唔駛係屋企悶到發毛,同餐餐食同一樣飯餸!

「坐月」

講真好多人都話坐月好緊要,因為當孕婦順利誕下嬰兒之後,係中醫嘅角度身體機能係可以重新調整。所以坐月係有好多唔同嘅習俗。而過去嚟個月我雖然唔係生嗰個,但係亦感受到坐月其實係一件幾悶同幾麻煩嘅一件事。好多嘢都要就住就住,同時又唔出得街,真係人都癲。雖然要差唔多全天候照顧個細,但係而家就明白點解啲人話產後好容易抑鬱。

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

 
  • 暖化中全球暖化問係越嚟越嚴重,好多時睇新聞都會用百年一遇嚟形容不同嘅極端天氣。好多人都會覺得全球暖化關自己咩嘢事,甚至乎覺得唔會影響到自己。所以無人會理會我哋生活緊嘅地球其實已經病入膏肓。仲以為有生之年唔會有問題?咁就大錯特錯!如果北極圈嘅氣溫可以達到三十度,咁你諗下啲冰會去晒邊?除咗水位上升之外,海水嘅鹽份降低,導致極端天氣越嚟越頻繁! Click to share on Facebook (Opens in new window)Click [...]
  • 盧凱彤其實睇到新聞嘅時候真係好呀愕然,起初以為自己睇錯,但係當不同嘅媒體都開始報導嘅時候就知道佢真係離開咗。盧凱彤係一個我好欣賞嘅音樂人,好多時睇演唱會都會睇下係唔係佢彈結他。或者大家對佢嘅了解唔深,甚至乎佢唱過啲乜嘢歌或者患有燥鬱症都唔知。有時看似一切都正常,但係有時正常就正正係唔正常。你辛苦了!雖然係一個好難接受嘅事實,但係相信大家都會尊重你嘅決定同永遠記得你! Click to share on Facebook (Opens in new window)Click [...]
  • 三歲了眨下眼郭大少就已經三歲了,當然今日要同佢慶祝啦。一起身同佢去上音樂堂,之後就去咗啟德嘅一間親子餐廳玩,然後再飛入去迪士尼睇巡遊同玩咗陣,因為夜晚同屋企人食飯慶祝。依家啲小朋友真係幸福,不過都係希望佢有一個開心嘅生日啫!見到佢健健康康咁成長,每日燦爛嘅笑容,其實就已經好足夠。不過時間真係過得太快,由一個嬰兒搖身一變,變成一個小朋友! Click to share on Facebook (Opens in new window)Click [...]
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。 Click to share on Facebook (Opens in new window)Click [...]