給老婆


個人分享
Tagged With: , , , , , , , , ,

「生日」

今日係我老婆生日,不過今年就有少少唔同。以前每年我都會搵間靚靚餐廳同老婆慶祝生日,但係因為今年老婆就要坐月已要係屋企。當然我好想同佢出去食餐好嘅,但係無計啦,坐月緊要。而今年就多咗郭大少同佢過生日,希望坐完月之後有機會同佢補祝今年嘅生日啦。以後就多個人同你同我一齊同你慶祝,希望你開開心心,快快樂樂,最緊要就係健健康康同我白頭到老!

「老婆」

過去幾年對我嚟講所有嘢其實都發生得好快,由準備結婚到而家屋企多咗個新成員,每一年都係一個新開始。而慶幸嘅係無論高低起跌我老婆都係身邊支持我。好多時我未必將所有嘢拎出嚟講,事關邊個想身邊嗰個擔心自己。今年你生日,就等我煮餐好嘅俾你食啦。知道坐月食嚟食去都係嗰啲嘢。唔緊要啦,今日生日就梗係食好啲㗎啦。

「感激」

趁今日老婆生日就梗係想同佢講句「我愛你」啦!除此之外就係一句「多謝你」!多謝你辛辛苦苦幫我生咗個咁得意可愛嘅仔仔,雖然而家同我理想嘅生活仲有一大段距離,但係我希望可以俾你同個仔一個幸福同溫暖嘅家。當然今後我仍然會好努力咁去達成嚟個目標,而之後每一年都可以同你開開心心咁過生日!祝老婆越嚟越靚,做個靚靚媽咪!