大爆炸

「天津」

近排忙到傻咗,初時係社交媒體睇到天津大爆炸仲以為淨係普通一宗爆炸咁簡單,點知第二日再睇新聞先知原來咁大鑊。爆炸嘅威力好似啱啱打完仗,俾人炸咗個城市咁,你都咪話唔驚。最離奇嘅係唔知點解個地方政府可以容許有一個咁嘅廠房係住宅區附近。而睇完啲相之後,如果同你講得好少人死嘅話,你真係當大家儍嘅咩?而家仲話有山埃毒,真係勁過生化武器!

「爆炸」

今次嘅天津大爆炸,威力等同二點三級地震,相當於二十一噸黃色炸藥。而事發嘅時候方圓十公里嘅範圍都感覺到,抬起頭亦可見蘑菇雲,就好似核爆咁犀利。如果你有睇到爆炸嗰刻嘅片段就應該知道爆炸嘅威力有幾大!再睇埋新聞見到爆炸之後附近嘅情況,你都可以知道今次爆炸又幾咁嚴重。而家除咗救援之外,仲要處理啲化學品對環境嘅影響,真係有排善後。

「人禍」

今次嘅爆炸無可厚非一定係人禍,有乜可能可以容許一個危險品物流倉庫咁近民居。先唔好理當時處理火警嘅時候啲消防員又無處理失當,因為如果個倉庫當初唔係起係果度,今次意外就唔會發生。我諗嚟啲嘢真係只會發生係中國,而其實人禍係可以避免。真係希望以後嚟啲事可以減少,唔好草菅人命。當然而家善後工作仲有排處理,而最大嘅問題就係唔知當時有幾多化學品,同之後影響有幾深遠。